〈拜年〉
刊於《新亞生活》月刊（2022年2月號）
－415 754 7250－
－加入會議－
－連線中 …… －
－主持人馬上會請您加入－
「喂，入緊去啦！過嚟啦！」萍轉身往門口外大喊。
「得得得！」銘趕忙跑進房間，整理著頸上的紅色圍巾。
「有喇有喇……新年快樂！」祝頌語此起彼落。畫面呈現出兩個對話框，共四個男女臉龐。
「好耐冇見喇！恭喜晒張生張太！」萍靠近屏幕注視畫面中的二人，歡悅喊道。
「頭先過咗利是俾你地喇，睇吓收唔收到？」Moon搭著Tim的肩膀，鏡頭下二人的桃紅色毛衣融為一片。
－點撃收取 月．Moon 向你發送的賀年利是 港幣200元－
「嘩！咁厚禮！多謝張生張太！」萍點擊電話屏幕，把利是收取，銘也連忙道謝。
「唔駛客氣喇，等你地兩個下年派返雙倍啦！」Moon咯咯地笑，一旁的Tim調整著黑框眼鏡，也禮貌地在旁微笑。
「係喎，咁你地頭先食完晏？喺嗰邊慣唔慣呀？」銘向他們問道。
「係呀，頭先過咗隔離屋拜年同煮飯食。佢地都係香港人，所以好快就friend到。我地住呢度都幾多香港人，叫係有個小社區啦。我地都搵到工喇，不過下個月先開始，所以當嘆埋今個月假期先。」Tim說罷，身後的柴犬便撲到他的身上撒嬌輕吠。「哎！毛毛夠鐘散步喇。我帶佢出花園先，你地慢慢傾！」
待Tim帶毛毛離開畫面後，Moon坐到鏡頭的中央位置，對著屏幕中的自己打理著捲曲長髮。
「咁我都唔阻你兩姊妹聚舊啦。保重身體呀Moon，遲啲過嚟探你地！」銘向她道別後徐徐站立，轉身同時將紅色圍巾脫下，離開了房間並關上門。
畫面剩下兩個女生，各自背後的窗戶透露著日光與黑夜。
「點呀你，最近好嘛？」Moon托著臉腮，向萍問道。
「OK啦，啱啱定咗日子簽紙，同埋約咗兩家人食飯，忙完一輪。你呢？新婚生活覺得點？」萍捧著電腦爬到床上，側臥身子注視畫面裡的Moon。
「嗯……都冇話新婚唔新婚，咪又係咁過，而且一直都忙住處理移民啲野。」Moon抓抓捲髮，若有所思。「好快囉，所有野都好快。突然結咗婚，突然移咗民，突然要重頭開始建立所有野。」
「係囉，中學嗰陣明明個個都賭你最遲結婚，點知你首當其衝。」萍伸伸懶腰。
「你係咪想講一馬當先呀。」Moon竊笑一聲。「咁要過嚟嘅話，結咗婚好辦事啲呀嘛。你都明㗎，好快到你啦。」
聊天室迎來一陣沉默。
「喂，你諗清楚未㗎？」Moon靠近螢幕問道。
「吓？咁……你諗清楚未吖？」萍也向她拋了一句。
「……我六月擺酒啦，場地都揀埋，仲有咩未諗清楚喎。」Moon連忙在電腦上搜尋了一會。
－分享畫面－
「嗱你睇，就係呢到喇。到時草地呢度會放個接待處，隔離係影相位，啲凳就放呢邊……」Moon用鼠標在婚禮場地圖片上指指劃劃。
「喂喂，你之前send過俾我睇喇。」萍截住了Moon的說話。
－分享畫面 取消－
「總之呢……」Moon吸了一口氣。「今日唔知聽日事，覺得啱嘅咪做咗先囉，呢幾年都慣咗呢種思考同生活模式了。不過，有得揀我都未必會想咁快走，畢竟係自己屋企。」
「其實我未想走住㗎。啲屋企人喺晒度又走唔到，而且……」萍也接著呼吸了一口氣。「不過銘間公司咁啱調佢過去，如果我唔去，我諗都好快玩完……所以一切都只係『咁啱』。我曾經仲以為自己會永遠留喺到，果然冇乜野係會『永遠』。」
聊天室又再迎來更靜默的沉寂。
「咪咁啦，新年流流，打起精神來！」Moon忽然起勁地說道。「我地會過到嘅！」
「毛毛好似肚餓呀，居然行咗陣就話要返嚟，啲狗零食放咗去邊話？咦，仲傾緊呀？」此際，Tim帶著毛毛回到家裡，並在畫面外嚷著。
「喂，你忙啦。六月擺酒記得寄帖返嚟呀，地址照舊。如無意外就六月見面喇。」萍在床上坐起身子，又再小聲地說道：「如無意外就兩個人過嚟嘅。」
「得㗎啦，唔好諗太多喇。」Moon安慰，同時又半帶不捨：「係喎，你都應該差唔多要瞓啦？咁遲啲再傾啦。」
「好啦，再傾。Bye-bye！」
－結束對話－
萍在床上輾轉，又靠到床頭櫃的一旁，凝視新買的月曆，看得出神。